【Now財經台】寫字樓租值已沉寂咗一段時間，去年整體按年跌8%，錄得2020年以來最大跌幅，主要受頂級寫字樓拖累，點睇下半年嘅情況？此外，置地廣場、交易廣場及環球貿易廣場呢類頂級指標寫字樓，租值按年跌逾10%，其中，置地廣場大跌18%，係受咩因素影響？
中原地產研究部高級聯席董事楊明儀指，睇到一個現象就係去年下半年，接近第4季，頂級寫字樓情況有改善，因為有國際資金例如投資基金嚟咗香港，呢啲資金都會揀頂級寫字樓，因此，估計今年頂級寫字樓會率先止跌回升。不過，甲級寫字樓仍會受壓，所以兩者合計後，預期今年仍會錄得跌幅，但跌幅冇2025年咁大。
佢續指，估計係2024年有3幢頂級商廈落成，出現咗一個搶客嘅情況，喺考慮價格後，有啲企業可能選擇搬去一啲較新嘅商廈，令租值喺2025年錄得顯著跌幅，不過，睇返呢8幢商廈，如果同高峰期比較，除咗IFC及ICC跌得較少，跌約30%，其餘6幢都跌約40%，所以大家嘅累積跌幅其實都差唔多。