【Now財經台】美國副總統萬斯(JD Vance)表示，美伊已電子簽署諒解備忘錄，受消息刺激，美股3大指數昨晚(15日)齊升，其中，納指收市飆近800點，費城半導體指數(SOX)更破頂，係咪可以確認美股之前下跌只係健康調整，非人工智能(AI)或半導體股牛市結束未？
滙豐私人銀行及財富管理北亞首席投資總監何偉華指，現時美股市況繼續由AI主導，只要AI相關企業盈利增長持續，美股仍會反覆向上，又預期第2季半導體企業盈利仍會向好。佢又話，美股近期較為波動，主因係通脹數據偏高，市場擔心聯儲局會加息，令升幅顯著嘅AI增長股承受較大獲利回套壓力，不過，隨著美伊傾掂數，市場預期霍爾木茲海峽(Strait of Hormuz)重開，油價有望回落，減輕通脹壓力，繼而令加息預期降溫，帶動增長股大幅反彈。
Patrick又話，有數據顯示，AI有助提升全球生產力、應用廣泛，各大超大型雲端服務商(Hyperscalers)對AI項目持續投入，所以仍係長遠發展趨勢，不過，投資者仍要留意短期波動，喺海峽正式重開後，中東石油出口設施能否快速回復出油量，以及各國會唔會因油價回落，減慢釋放戰略性儲備速度，都會影響油價及市場投資情緒。