【Now財經台】內地今朝(10日)出咗上月通脹數據，5月居民消費價格指數(CPI)按年升1.2%，略低過預期，工業生產者出廠價格指數(PPI)按年升幅加快至3.9%，創新高，亦係2022年7月以來最高水平，未來會唔會進一步上升？
工銀亞洲金融市場部高級經濟師程嘉偉指，PPI上升主要受輸入性通脹影響，但大宗商品價格按月係回落咗，油價由每桶逾百美元回落至現時約90美元，展望PPI未來走勢，若大宗商品可維持現時回落嘅水平，PPI峰值應該已經到咗，但好取決於美伊戰事發展及大宗商品價格，若7月能源市場出現轉變，或大宗商品價格突然抽升，唔排除PPI會進一步上升。
CPI方面，Gary就話，睇返CPI分項，見到能源相關分項如交通、出行等，已率先喺前1、2個月升咗上去，整體結構方面，食品、消費品對CPI嘅拖累係最嚴重，原因係內地豬肉供應特別多，去庫存需時，但佢預期，年底豬價可望大幅回升，將逐步反映喺CPI。