【Now財經台】人工智能(AI)狂熱持續，其中一個贏家美光(Micron)將會喺美股明日(24日)收市後出季績，股價喺放榜前繼續破頂。市場除留意聯儲局對利率前景看法，亦要睇人工智能(AI)narrative，結合兩者來看，利率前景會唔會影響人工智能(AI)發展？投資者又要留意乜嘢？
星漢資產管理行政總裁王榮昆指，假設美息維持不變，以及流動性環境保持寬鬆，AI泡沫就唔會爆破，他又指，過去大型泡沫爆破前，利率環境通常會收緊，liquidity亦會變差，反映市場已經冇油水撈。
James續指，對油水多少嘅判斷取決於QT(量化緊縮，Quantitative Tightening)嘅實行，任何QT行為都會直接衝擊銀行bank reserve，銀行對此或會執行推遲票據結算，從而夾升擔保隔夜融資利率(SOFR)，導致SOFR與準備金利率(IORB)息差上升，若達15至30點子以上，投資者就會憂慮市場是否油水唔夠。