【Now財經台】南韓監管機構昨日(23日) 針對交易所買賣基金(ETF)發風險警示，拖累南韓股市急瀉10%，有報道指，外資及機構投資者淨沽出韓股，美股嘅半導體、人工智能(AI)相關股昨晚亦急插，係咪一個由韓股引發嘅「蝴蝶效應」？
摩根資產管理環球市場策略師周奐彤指，環球市場對AI新聞敏感度提高咗唔少，所以相關波幅、頻率都會加大，南韓股市今輪升勢唔係一個技術性反彈，見到基本面持續有改善，亦多咗散戶投資韓股槓桿ETF，相信昨日係借勢做倉位調整。
半導體及AI相關股方面，Marcella就話，市場都睇得幾兩極，如果公司投放好多資本發展AI，市場就擔心可持續性，但唔投資又擔心會唔會落後於其他市場，但佢相信，無論亞太區股市還是美股，投資者未來仍然會繼續圍繞AI、半導體話題討論，整體繼續睇好。
周奐彤續指，特別睇好南韓及台灣企業，亦可以多留意日本相關公司，睇返基本面，晶片需求特別強，加上供應緊張，相關公司議價能力好強，對盈利有支持，雖然估值貴，但南韓、台灣都接到定單，前景繼續睇得樂觀。