【Now財經台】美國通脹升溫，日前出爐嘅5月消費物價指數(CPI)按年升4.2%，生產物價指數(PPI)就按年升6.5%，齊創3年新高，到底美國通脹幾時見頂？通脹持續高企令美國加息預期升溫，據最新利率期貨顯示，年底加息機會已逾70%，喺呢個情況下聯儲局係咪都冇可能減息？
法巴財富管理香港首席投資策略師譚慧敏表示，雖然美國CPI及PPI處於高位，但重點係仍符合市場預期，加上撇除食品及能源價格嘅核心CPI升幅細過預期，因此，關鍵在於未來通脹高過還是低過預期，市場本來已預咗油價高企，通脹數字會相應高少少，只係未來升幅係符合還是遠超預期。
佢又指，美國核心通脹低過預期，反映即使能源價格飆升推高通脹，但聯儲局都唔係好擔心，油價高企會推高其他產品及服務業價格，所以未有加息迫切性。
Grace估計，聯儲局傾向按兵不動，而市場對通脹嘅憂慮會影響下半年市況，包括導致債息上升，若債息抽得好高，對整體金融及股票市場會有影響，未來幾個月未必會有加息行動，但債息走向會困擾市場。