【Now財經台】甲骨文(Oracle)第4季總收入192億美元，按年增長逾20%，超預期，其中，屬於人工智能(AI)業務嘅雲端總收入按年增長47%，成為集團增長火車頭，經調整每股盈利都好過預期，Oracle交出一份亮眼業績，係咪反映AI相關需求持續熾熱？Oracle股價昨晚(11日)早段一度急瀉近13%，喺公司擴大基礎設施下，生意做多咗，應唔應該趁股價大跌撈貨？
易方資本投資總監王華表示，雖然AI需求仍然熾熱，但市場比較擔心Oracle嘅股權融資問題，為咗提升競爭力資本開支好大，所以持倉方面，會偏向持有上游嘅英特爾(Intel)、Lumentum等光通訊股，Oracle唔會係重點持倉。
佢續指，對擴大基礎設施呢種形式嘅擴張相對保守，現時Token跌緊價，整個產業鏈嘅平均銷售單價(ASP)又縮緊水，大模型又唔係好賺錢，仍要靠佔比唔大嘅上游業務賺錢。