【Now財經台】新盤去年平均加價唔夠5%，但今年有個別項目大幅加價約30%，發展商今年開始改變銷售策略，唔再以低價吸客，究竟發展商點評估定價時機？雖然新盤逐步加價，但同2021年高峰時期比較仍有距離，下半年新盤開價會唔會更進取？
仲量聯行項目策略及顧問部資深董事李遠峰表示，發展商定價策略係取決於佢哋嘅存貨量，去年新盤銷售逾20000宗，今年首5個月已超過10000宗，去貨速度十分理想，所以發展商定價策略亦由保守轉為進取，例如日出康城新盤平均呎價，由上年14000元至15000元，升咗近10%，現時介乎15000元至16000元。
佢又指，今年上半年新盤價格及銷售都好理想，不過，下半年有可能受全球通脹、加息等不確定性影響而放緩，大部分新盤樓花期會偏長少少，本地買家會因上半年表現理想而信心大增，入市意欲增加，整體購買力仍會持續，只係升幅可能唔及上半年顯著。