【Now財經台】雖然美匯、芝加哥期權交易所波幅指數(VIX)及油價等風險指標全線回落，但債息不跌反升，市場係咪仍憂慮通脹及加息風險？美股昨晚(8日)一度反彈，可能受Google加單、OpenAI已交IPO申請等消息刺激，但收市都要跌，點睇美股後市？
高富金融集團投資總監梁偉民指，近期債息有明顯上升趨勢，主因係美國經濟數據強勁，雖然美國10年期債息未去到令人最擔心嘅水平，但2年期債息已升上逾5月高位，而債息一向行得快過聯儲局嘅貨幣政策決定，就算市場開始擔心加息風險上升，都只係提早反映年底有機會加息1次，佢估計，聯儲局未來幾個月都會按兵不動，投資者要留意美國明晚(10日)出爐嘅通脹數據。
Wyman又話，科技股相關消息短線有利市場氣氛，市場對人工智能(AI)嘅信念仍然好大，只要科企繼續投入資本開支，即使息口上升會令估值受壓，半導體及記憶體公司嘅盈利及收入，未來1至2年仍可持續高企。
不過，最近好多科企都要發債或發新股集資，所以要留意明年科企資本開支，仲可唔可以維持大幅增長，以及投資變唔變到現，以支撐未來開支。